Leew Lütsches, dat verleden Jor het sech bie us Waddische weer allemolen völl togedregen. On no dem Loup van 365 (drei-hounert fief-on-sessich) Dach wör et mol höchste Tied, no achtern to kieken, wat dat dann alle wor. Nu es et fott, dat aule Jor. De Aultjorsomend es vöröwer, so seggen se all metenein vör sech: Prost Nöüjor, de Kopp voll Hor, de Mul voll Tein on en Nöüjörken en de Hein. Gewt et dat noch bie Önk, gebacken Tüch vör den erschten Dach, ’ne Schliepe odder en Brezel? Odder doch en kroschen Iserkoken van dönnem Waffeldeich, gespickt met Schmaund on Kaschen?
Jannewar: Fasselomend
Wi hadden op alle Fälle bim erschten Komm-Omend van 2024 (twentich veer-on-twentich) den Kopp all voll Fasselomend. Wadden Helau – denn kott drop geng se all weer los, de Session met dem gecken Bollerkarrentreck einmol rengs dörch de Stadt. Us Motto döt Jor: Blos Waddisch es en AfD met Hatten, en „Alternative für Deutsch – mit Herz“! Wi hadden jo bie us so‘n recht Narrenquartier. Vören on drachterher hewwen se sech bie us opgewärmt. Met de Nommer 6 (sess) em Treck geng et denn met goddem Senn on lecker Klömpkes op Jöck. Do hewwen wi us en Teller Ertensopp döchtech verdeent!
Febewar: Aul Wadden on de Ruhr
Läter em Febewar keeken wi met Peter Bankmann op dat aule Wadden on de Ruhr. He vertaul van de völlen Bröggen, de en de vörigen tweehounert Jor öwer dat Water gelacht woren. En Ströpp dörch de Tied on wi mossen noch net ees vam Stol opston. – Öwer de Sommertied moken wi ouk wat Teorie. Do hewwen wi dann de Froch nogespört, wat es dann Waddisch eigens on wo genau wod dat gekallt?
Sommer: Wat es Waddisch?
So woulen wi van Lüt op Facebook weeten: wat meinen Gött, wo spreken dann so as en Wadden? On wi sogen – ut döse Ömfroch on de Geschechte – dat Wadden, Feschlaken on Heidhusen met de Tied to ein Plecken verwassen send. Ouk en de Sproke. Aunere Kaunten, drouner Breenei on de Langenhorst, de ees Waddisch sproken, gengen derwielen verlöstech. Merkent Önk dat so: Wo et de Waddische to lesen gewt – en Wadden, Feschlaken, Heidsen on Schür – do wod ouk Waddisch Platt gekallt.
Oktower: Fier vanne Heimotsproke
On van wat nu folcht, so wod so völl vertault, wo stoun dann nix van to lesen? Alle Bläers woren voll domet, as wi em Oktower use Sproke fieren deren. Wat wor do eigens bowenan? Dat et usen Komm-Omend boll hounert Jor gewt? Dat met „Bramballe on Imseike“ dat erschte Bok siet öwer twentich Jor rutkom? Dat et nu op de Siet waddisch.de en eigen digital Wöerbok vanne waddische Sproke gewt? Selws usen böwerschten Börger kom do grad van Essen ut dat hoge Rothus no us Waddische hen: De erschten Wöt der nömmes aunersch as Thomas Kufen spreken, leew bedankt! Ouk allerhaund Noberslüt, so van Mölm, Bokem on Gott weit, wo noch all, komen no us angebrust.
Besök vam Mölmschen Goddesdeenst
Mölm, genäukes: San, do geng et dann de Weeke drop hen. Denn do fieren se einmol em Jor en de Dorpkerke en Goddesdeenst op Mölmsch Platt! No dat de Mölmschen us besöken deren, woren wi dran. „Usen Vader, den du bes em Hemmel, gehillich wed din Name, din Riek sall kommen, grad as we du et wos, sall et sein, we em Hemmel, so ouk op de Ed.“ So on so widder hewwen se dann gebett. No en Preddicht op Platt on en Vörlesen van Psalm 19 (negenten), Vesche 8 (acht) bes 15 (fieften) komen se drachterher noch vör en Kopp Koffee tesamen – on dröwer lött sech jo noch beter en Schwätzken haulen.
November: Waterdeeren god gekokt
Mangs gewen wi us jo net blos an dat Kallen, noch auner waddische Spezialitäten kommen bie us op den Desch. On en alle Monnt met „R“ es et jo Tied vör en besouner Waterdeer: de suppige Moschel. Op aule Wies kom se no us op den Deller geschwommen, met en Brö van witt Wien on en Pöngel Gröns. Dobie noch en lecker Schwattbrot met Botter – dat schmackt! We do fies vör es, kreech en selwsgebacken Koken vam Walburga Küthen met em Tass Koffee.
Dezember: Waddischen Klosmat
Em aulen Jor gow et om waddischen Klosmat vör de erschte Ker ouk en Speelbön. De Werbering socht dovör allerhaund Programm, do dorw de Komm-Omend jo net utbliewen! So geng et dann den Sotersdach on Sonndach vör den Lürs am Mat, de dann doch net do wor. Wo het he sech dann verstoppt? Wi wossen Bescheid. – On no dem Klosmat kom de Klosfier. An dat Ein vam Jor soten wi all tosamen bie Kloskels on lecker Spekelats on leeten et gemäcklech op Chresdach angon. Met bie us em Kreng wor Norbert Fabisch, de Nettsches vör antokieken metbracht: so moken wi en Knöpp en dat Jor 2024 (twentich veer-on-twentich), as he us met Mittweg sin Fotos vam aulen Wadden van fröer vertaul. So woren wi döt Jor besouners flöck. Nu lott kieken, wat wall 2025 (twentich fief-on-twentich) vör us brengt. Mer dat Beste, dat hopt met dem ganzen Komm-Omend
Wadden, om erschten Janner twentich fief-on-twentich
Marc Real
Vörsetter vam Komm-Omend
AK Waddisch Platt em Waddischen Börger- on Heimotkreng
Schreibe einen Kommentar